ಬೆಂಗಳೂರಿನ ಅಲಯನ್ಸ್ ವಿಶ್ವವಿದ್ಯಾಲಯದ ಭಾಷೆ ಮತ್ತು ಸಾಹಿತ್ಯ ವಿಭಾಗದಿಂದ ಪ್ರಕಟವಾಗುವ ಅನುಕರ್ಷ್‌: ತಜ್ಞ- ಪರಿಶೀಲಿತ ತ್ರೈಮಾಸಿಕ ಪತ್ರಿಕೆಯು (ISSN: 2583-2948) ೨೦೨೧ನೇ ಸಾಲಿನಲ್ಲಿ ಆರಂಭವಾಗಿ ತನ್ನ ಪ್ರಕಟಣೆಯ ನಾಲ್ಕನೇ ವರ್ಷಕ್ಕೆ ಕಾಲಿಟ್ಟಿದೆ. ದೇಶದ ವಿವಿಧ ಭಾಗಗಳ ಸೃಜನಶೀಲ ಬರಹಗಾರರು, ಸಂಶೋಧಕರು, ಲೇಖಕರು ಹಾಗೂ ವಿಮರ್ಶಕರ ಸಹಯೋಗದಿಂದ ಪತ್ರಿಕೆಯು ವೈವಿಧ್ಯಮಯ ವಿಷಯಗಳೊಂದಿಗೆ ಬಹುಭಾಷಿಕವಾಗಿ ಪ್ರಕಟವಾಗುತ್ತ ಬರುತ್ತಿದೆ.

ಅನುಕರ್ಷ್‌ ಪತ್ರಿಕೆಯ ವತಿಯಿಂದ ಈ ಸಂಚಿಕೆಗಾಗಿ ಬರಹಗಾರರಿಂದ ಸಾಹಿತ್ಯದ ಯಾವುದೇ ಪ್ರಕಾರಕ್ಕೆ ಸೇರಿದ ಮೌಲಿಕವಾದ ಸೃಜನಾತ್ಮಕ ಹಾಗೂ ವಿಮರ್ಶಾತ್ಮಕ ಬರಹಗಳನ್ನು ಪತ್ರಿಕೆಯಲ್ಲಿ ಪ್ರಕಟಣೆಗಾಗಿ ಆಹ್ವಾನಿಸಲಾಗಿದೆ. ಕಲೆ, ಸಾಹಿತ್ಯ, ಸಮಾಜ ವಿಜ್ಞಾನ ಹಾಗೂ ಸಂಸ್ಕೃತಿಗಳ ಜೊತೆಗೆ ವೈಜ್ಞಾನಿಕ ಲೇಖನಗಳನ್ನು ಸಹ ಲೇಖಕರು ಕಳುಹಿಸಬಹುದಾಗಿದೆ.

ಎಂದಿನಂತೆ ಪ್ರಸ್ತುತ ಸಂಚಿಕೆಯನ್ನು ಸಹ ಕನ್ನಡ, ಇಂಗ್ಲೀಷ್‌ ಹಾಗೂ ಹಿಂದಿ ಭಾಷೆಗಳ ಬರಹಗಳನ್ನೊಳಗೊಂಡು ಪ್ರಕಟಿಸುವ ಉದ್ದೇಶವನ್ನು ಹೊಂದಿದ್ದೇವೆ. ಆದಾಗ್ಯೂ ಇತರೆ ಭಾರತೀಯ ಭಾಷೆಗಳಿಂದಲೂ ನಾವು ಬರಹಗಳನ್ನು ಮುಕ್ತವಾಗಿ ಸ್ವಾಗತಿಸುತ್ತೇವೆ. ಬಹುಭಾಷಿಕ ಹಾಗೂ ಅಂತರಶಿಸ್ತೀಯ ವೇದಿಕೆಯಾಗಿ ಅನುಕರ್ಷ್ ಪತ್ರಿಕೆಯು ವೈವಿಧ್ಯಮಯ ಭಾಷಿಕ, ಸಾಂಸ್ಕೃತಿಕ, ವೈಚಾರಿಕ ಹಿನ್ನೆಲೆಯ ವಿದ್ವಾಂಸರು, ಬರಹಗಾರರು ಮತ್ತು ಸಾಹಿತಿಗಳನ್ನು ಒಟ್ಟುಗೂಡಿಸುವ ಸಂಪರ್ಕ ಸೇತುವೆಯಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ನಾವು ಭಾವಿಸಿದ್ದೇವೆ.

ಪ್ರಸ್ತುತ ಸಂಚಿಕೆಗಾಗಿ ದೇಶದ ಗೌರವಾನ್ವಿತ ಬರಹಗಾರರು, ವಿದ್ವಾಂಸರು ಹಾಗೂ ಸಂಶೋಧಕರು ಲೇಖನ, ಪುಸ್ತಕ ವಿಮರ್ಶೆ, ಕಥೆ, ಕವಿತೆ ಸೇರಿದಂತೆ ಯಾವುದೇ ಪ್ರಕಾರದ ಅಪ್ರಕಟಿತ ಹಾಗೂ ಎಲ್ಲಿಯೂ ಪ್ರಕಟಣೆಗೆ ಸಲ್ಲಿಸದ ಬರಹಗಳನ್ನು anukarsh@alliance.edu.in ಇ-ಮೇಲ್‌ ವಿಳಾಸಕ್ಕೆ ಸೆಪ್ಟೆಂಬರ್‌ ೧೭, ೨೦೨೪ರೊಳಗಾಗಿ ಕಳುಹಿಸಿಕೊಡಬೇಕೆಂದು ನಾವು ಕೋರುತ್ತೇವೆ. ಕನ್ನಡದಲ್ಲಿ ತಮ್ಮ ಬರಹಗಳನ್ನು ಕಳುಹಿಸಲಿಚ್ಛಿಸುವವರು ಯುನಿಕೋಡ್‌ ಅಥವಾ ನುಡಿ ೧೩ ಫಾಂಟ್‌ ನಲ್ಲಿ ಬೆರಳಚ್ಚು ಮಾಡಿ ನುಡಿ ಹಾಗೂ ಪಿಡಿ ಎಫ್‌ ಎರಡೂ ನಮೂನೆಗಳಲ್ಲಿ ಕಳುಹಿಸಿಕೊಡಬೇಕಾಗಿ ವಿನಂತಿ. ತಮ್ಮ ಬರಹಗಳನ್ನು ಸಲ್ಲಿಸಲಿಚ್ಛಿಸುವ ಬರಹಗಾರರು ತಮ್ಮ ಬರಹದ ಜೊತೆಗೆ ಅ) ಹೆಸರು, ಆ) ಕಾರ್ಯನಿರ್ವಹಿಸುತ್ತಿರುವ ಸಂಸ್ಥೆ/ವಿಳಾಸ, ಇ) ಇಮೇಲ್‌ ವಿವರವನ್ನು ನಮೂದಿಸಿರಬೇಕು ಈ) ಲೇಖನ ಸ್ವೀಕೃತವಾದ ನಂತರ ಸಂಪಾದಕ ಮಂಡಳಿಯು ನೀಡುವ ನಮೂನೆಯಲ್ಲಿ ಘೋಷಣಾ ಪತ್ರವನ್ನು ಸಲ್ಲಿಸಬೇಕು.